Australia Laipa Ram Tin Thei Biachim Cu A Mak Tak Tak.

Australia kan Laipa Ram Tin Thei biachim mi cu a mak tak tak. Khuaruahhar ngaingai khi asi. Uar um taktak fawn. Asinain a cheu caahcun a biachim mi hi cohlan khawh a si bak lo. Minung kan i lawh lo bantuk in kan ruahning zong aa dang cio. Mah cacun tutan a biachim mi zong hi mi tampi nih a ttha taktak an ti lai i, a cheu tu nihcun kan ruahnak aa lo lo an ti ve fawn lai.

Australia kan Laipa Ram Tin Thei hi kan theih khawhnak ding ahcun Austalia Perth i District pakhat bantuk a simi City of Stirling’s Balga Ward ai awh i thimnak (Government Election) ah rak i zuam ve bal cangmi asi. A men bak lomi a si fawn.

Mah ti hin Australia kan Laipa Ram Tin Thei nih a chim, ” Kut tlaih khawh ka si, nan duh ahcun kan tlaih khawh ve hna . Nan ka kuh khawh fawn, nan ngamh ahcun kan kuh khawh ve hna. Zawtnak ka ngeilo, nan ngeih zongah kan tih hna lo, kan hrial fawn hna lailo.

Hi zawtnak ruangah ka nunnak a liam lailo. Nan nunnak a liam ve hrimhrim lailo. Bawipa nih a ka umpi ti ka hngalh, an umpi zungzal ve hna. A thawnnak in nifatin a kan humzual. Salm 91 ah fiangte in a kan kamh.

Ka va zawt sual i ka nunnak a va liam sual aikun, Bawipa nih hi Vawlei ah nun a ka sianh tilo i a sinah kir dingin a ka auh cang caah asi lai. Zumtu nihcun hi zawtnak ruangah pumh ngamlo, minung hawi he ikomh ngamlo, minung hawi sinah va chuah ngamlo te hna in kan um awk asilo. #HumanityALive.” tiah a chim.

Comment tu pakhat nih mah ti hin a leh ve , “Roro Fambawl Hi zawn ahcun kan hmuhning aa dang ngai. Kei nih cun kanmah zawn lawng i ruat loin midang zawn zong kan ruah hna awk a si, ti hi ka kalpi. Kanmah nih cun kan ttih lem lai lo, mino kan si, kan thisa a tthawng. Virus kan cung a phanh hmanh ah thlop hau loin kanmah tein kan dam kho tthan ko hnga.

Asinain kanmah nih kan hei chawnh chinmi minung hna ca ah khin ttih a nung tuk kho. Tar deuh le thisa der deuh ca ah an nunnak tiang a tthih khawh. Kan thih paoh ah hin “Pathian remruat” kan ti awk hi a si lo tiah ka ruah. WHO nih nunkhua saunak le ngandamnak kong he pehtlai in research a tuahmi ah zeiruang ah nitlak lei ram an nunkhua a sau i nichuah lei kan nun khua a tawi? Ziah Kawlram hna hi nunkhua kum 66 hrawng a si lio ah Europe lei hi kum 80 leng a kai? I runvennak le i zohkhenhnak a tthat deuhnak paoh ah ngandamnak le nunkhua saunak hi a tam deuh ve.

Cucaah atu lio kan dirhmun hin cun zapi lak chuah langh le kal hi cu kanmah himnak ca lawng hmanh siloin MIDANG himbak ca kan ruah piak hna a biapi ngai.” tiah a leh ve. Comment nak lei ah nan ruahnak cio van chim ve tuah u.

Credit : Ram Tin Thei