Palik Zuri Pakhat Nih Kum 13 Ngahchiapa Meithal In A Kah Thah

Pago ramṭhen, Taungngu(တောင်ငူ) pengkomh Htantapin(ထန်းတပင်) peng Zayatkyi(ဇရပ်ကြီး) palik camp um, palik Htun Htun Win cu nizan May 11 zan ah zurit buin meithal a puah thluamah caah a pawngkam inn ummi ngakchiapa kum 13, Myo Myat Htun cu meithal kuan nih a khen caah a nunnak liam colh, tiah tualchung mi sin in theih a si.

May 11 zaan sml 8:30 hrawng ah mei a mit, Myo Myat Htun cu a zawmi a nu ca ah sanpioh eiter ding in coka a kal i Zuri pa palik Htun Htun Win nih duh paoh in meithal a kah caah Myo Myat Htun cu meithal kuan nih hmunhnih in a khen i a thi colh, tiah theih a si.

“Myo Myat Htun nih a zawmi a nu cu sanpioh a eiter lioah Htun Htun Win nih a ṭaang ah meithal in a kah hi a si, An inn hi palik camp hnu ah a um i Palik pa nih a chim ning ahcun minung thlapale ka hmuh i ka kah tiah a ti. Anih hi palik Ar Ka Soe i a naupa a si, Palik camp nih Myo Myat Htun a nule pa cu sing 15 in an va nawl hna, tiah tualchung mi pakhat nih a chim.

Myo Myat Htun a ruak cu May 13 ah an vui te lai, Palik pa nih a thahnak kong hi khoika hmanh ah nan chim lai lo, tiah palik pawl nih a nu le pa cu an tlerhkhonh hna tiah theih a si.

Shan ram Muse(မူဆယ်) peng, Lashio-Musae lampi ah private motor he a kal mi SAC ralkap hna cu PDF phufonh nih an kah hna i, SAC ralkap 20 an thi, PDF in minung 2 an nunnak a liam, tiah People Security And Defense Army – Muse nih an thanh.

May 4, zaanlei suimilam 5:40 ah Lashio-Muse motor lampi ah SAC ralkap khah-mah-yiah 241 le khah-mah-yiah 420 hna cu private motor 5 in Muse lei an kir lei Maungtaw(မော်တောင်း) khua le Talung (တာလုံ) khua kar ah Muse PSDA le tualchung hriamtlai phufonh hna nih an kah hna, tiah theih a si. “SAC ralkap lei a thi mi 20 le hliamhma tuar mi 4 an um. Kanmah lei in minung 2 nunnak a liam i, 3 nih hliam an tuar,” tiah PSDA chungtel pakhat nih a chim. Crd: the chin post